Жетісудың кіндік қаласында жыр сүлейі Сүйінбайдың тас мүсіні тұғырға қонды. Талдықорғанда құрылысы аяқталуға шақ қалған Спорт сарайының алдына қойылған ескерткіш шаһардың шырайын арттыра түспек.
Осыдан бірер жыл бұрын өңірдегі зиялы қауым Сүйінбай ақынның ескерткішін орнату туралы ұсыныстарын білдірген болатын. Көпшілік пікірін қолдаған облыс әкімі Серік Үмбетов ескерткіштің жасалып, орнатылуын тікелей өзі қадағалаған.

«Мәдени мұра» бағдарламасына орай, әрі облыс тұрғындарына мәдени қызмет көрсетуді жақсарту жөніндегі облыс әкімдігінің қаулысын орындау мақсатында 2006 жылы Еңбекшіқазақ ауданы, Ақши ауылында ұста Дәркембай атындағы қолөнер музейі құрылған болатын.
Музей ғимаратының жалпы көлемі 375 шаршы метр, Мұражайға 2008-2010 жылдары күрделі жөндеу және экспозициялық безендіру жұмыстары жүргізіліп, ертең салтанатты түрде ашылғалы отыр. Шараға облыс әкімі Серік Үмбетов және Қазақстанның халық жазушысы, ақын Тұманбай Молдағалиев қатысады деп жоспарлануда.

Осыдан 30 жыл бұрын сүлей ақын Сүйінбай мен жыр алыбы Жамбыл жырларынан нәр алған «Құлансаз» этнографиялық ән-би ансамблі қайта құрылған қалпында алғашқы концерттік сапарын Қарасай ауданынан бастады.

«Ұлттық мәдениетімізді ұлықтап, бар мен жоғымызды түгендеп, келер ұрпаққа аманаттау – «Мәдени мұра» бағдарламасының басты мақсаты» деген Елбасының ұлағатты сөзін бағдар еткен облыс және аудан басшылары «Құлансаз» фольклорлық-этнографиялық ән-би ансамблін құлпырту үшін биыл барын салды. Сол үшін бюджеттен бөлінген 40 533,0 мың теңгені ұқсата білген ансамбль ұжымының көркемдік жетекшісі, Қазақстан Республикасының еңбек сіңірген әртісі, «Дарын» мемлекеттік жастар сыйлығының лауреаты Ержан Қосбармақовтың еңбегін де бөле атаған орынды. Оған көмектескен белгілі ақын, сатирик Толымбек Әлімбекұлы, музыкалық жетекшілер Марат Жалбыров пен Ізбасхан Мұхитұлы, балетмейстерлер Ғалия және Әлия Мырзахановалар, гриммен әрлеуші Жазира Әбілқайырова, тағы басқа ынталы азаматтар айналасы төрт айда «Құлансаз» фольклорлық ән-би ансамблін саф алтындай қайта жарқыратты. Ансамбльге 48 штаттық орын бөлініп, музыкалық аспаптары, сахналық киімдері, аппаратурасы мен студиясы түгелдей жаңаланды. Репертуарына отыздан астам әндер мен күйлер, билер таңдалды. Әншілер тобында 12, бишілер тобында 14, оркестрде 15 адам уақытпен санаспай күндіз-түні шығармашылық ізденіспен толайым тер төкті. Соның арқасында «Құлансаздың» үні құлақ құрышын қандыратын, жүрекке шуақ құятын дәрежеге жетті.
Аталған ансамбль жуырда өзінің 30 жылдық мерейтойын атап өтті.