Ақсу ауданы, Қызылағаш ауылының тұрғындары - ауылдық ақсақалдар алқасының төрағасы Мәдінәзір Рахметов, Ақсу аудандық ардагерлер кеңесінің мүшесі Сайлау Алдабергенов, зейнеткер Дмитрий Юрковский, көп балалы ана Несіпжамал Алшынбаева, «Нұр Отан» ХДП ауылдық ұйымының төрағасы Әлғұмар Ыдырысов, Ауған соғысының ардагері Серік Тыналиев, шаруа қожалығының басшысы Александр Квитко, жас ақын Лескен Әлбатыр Қызылағашты қалпына келтіру жұмыстарына ризашылықтарын білдіріп, Елбасы Нұрсұлтан Әбішұлы Назарбаевтың атына жеделхат жолдады.

Елбасының қолдауымен бастау алған «Менің елім!» атты республикалық жастар форумына үн қату мақсатында ұйымдастырылған Талғар ауданындағы «Жастар – елдің сенімді болашағы» атты облыстық жастар фестиваліне аудан жастары түгелдей дерлік қатысып, белсенділік танытты. Фестивальға облыстық ішкі саясат басқармасының бастығы Гүлжиян Сүлейменова, аудан әкімі Талғат Өмірәлиев, Еңбек Ері Ыдырыс Әбдіғұлов бастаған ел азаматтары мен Талғар қаласындағы колледждердің студенттері, «Жас Отан» жастар қанатының мүшелері, мектеп бітіруші түлектер қатысты. Қаланың орталық алаңына жиналған қауымнан ине шаншар орын болмады.

Бүгін Қызылағашта 86 жаңа үй және күрделі жөндеу жүргізілген 10 үй тұрғындар игілігіне берілді. Су тасқыны салдарынан кетеуі кеткен мәдениет үйінің күрделі жөндеуден кейінгі жаңа келбеті көз сүйсінерлік кейіпте. Кілт тапсыру салтанатының осы сәулетті ғимаратта өткізілуінің өзі қызылағаштықтардың қуанышын еселей түсті.
Ауылдық әкімдік ғимараты мен ішкі істер бөлімінің тірек пункті де осы күні жаңарған ғимаратта өз жұмыстарын бастады. «Қазпочта» ғимаратының да жөндеуі аяқталды. Бұл жолы салтанатты шараны облыс әкімі Серік Үмбетов алапат су тасқынынан Алланың құдіретімен аман қалған, жөндеу жұмыстарынан кейін жаңартылған ауылдың мешітіне арнайы барып, құрбан шалып, Құран бағыштаудан бастады.
Ақтоғандық тұрғындар осы күні 16 жаңа үй мен жөндеуден кейінгі 10 үйдің кілтін алды. Ал Егінсуда 29 отбасы осындай қуанышқа кенелді.

Мектеп бітіруші түлектердің білімін саралап, олардың алдағы өміріне жол ашар негізгі сынақ – Ұлттық бірыңғай тестілеу басталды. Республика бойынша тест сынақтары 4-10 маусым аралығында өтеді. Облысымызда да 4 маусым күні басталған ҰБТ облыс және аудан орталықтарының 15 пунктінде, І. Жансүгіров атындағы Жетісу мемлекеттік университеті мен Алматы қаласындағы 1 жоғары оқу орны базасында өтуде.

Алматы облысының Жамбыл ауданындағы Аққайнар ауылына табиғи газ тартылды. Бұл шара Алматы облысын кешенді газдандырудың өңірлік бағдарламасы аясында жүзеге асырылды.

Ақсу ауданында «Жол картасы» бойынша 202 адам жұмысқа тартылған. Әлеуметтік жұмыс орындарына 260 адам жіберіліп, олар екі қолға бір жұмыс тапқан. Жоспар бойынша бөлінген 23402,0 мың теңге қаражаттың 3901,0 мың теңгесі тиісті орнына жұмсалған. Ал жастар практикасымен 80 адам еңбекке орналастырылып, 300,0 мың теңге көлемінде қаржының игерілгені көңілге демеу. Сонымен бірге бүгінгі күнде 10 мамандық бойынша 83 адам кәсіби оқуға жіберіліп, жаңа мамандықтың қыры мен сырын меңгеру үшін білім алуда. Осыған орай, бағдарлама бойынша пайдалануға берілетін әлеуметтік нысандар мен объектілерді партиялық бақылау посттары мен жауапты мүшелері бекітіліп, қадағалау жұмысы тыңғылықты атқарылуда. Бұл бағытта сырттан келген жұмыс күшінің орнына тұрғылықты халықты тарту жөніндегі облыс әкімінің тапсырмасы назарға алынған.

«Жол картасы» дағдарысқа қарсы бағдарламасын жүзеге асыру ауқымында барлық аудандар мен қалаларға қомақты қаржы қарастырылып, жолдар жөнделіп, көшелер көріктеніп, білім және денсаулық сақтау салалары, тұрғын үй-коммуналдық шаруашылық нысандары жөнделіп, жаңартылып жатыр. Осындай маңызды жұмыстар қолға алынған аймақтар қатарында шалғайдағы Райымбек ауданы да бар. Таулы өңірде орналасқан ауданға аталған бағдарлама аясында 340 млн. теңгеден астам қаржы бөлініп, осынау қомақты қаражатты мақсатты игеруге байланысты үлкен істер атқарылуда. Әсіресе, мектептердің жағдайын жақсартуға баса назар аударылып отыр.

Облыс әкімдігінде әкімдік жанындағы Қазақстан Республикасының Мемлекеттік рәміздері жөніндегі комиссия отырысы өтті.

облыс әкімінің бірінші орынбасары Амандық Баталовтың төрағалық етуімен, облыс әкімінің орынбасары Серік Мұқановтың және облыстық бюджеттік бағдарламалар әкімшілері мен Қапшағай қаласы мен Сарқан ауданы басшыларының қатысуымен «Жол картасын» жүзеге асыруды үйлестіру және мониторинг жүргізу жөніндегі комиссияның кезекті отырысы өтті. Онда осының алдында бір апта бұрын болған басқосу барысында берілген тапсырмалардың орындалуы, сайтқа «Жол картасы» жұмыстары жөнінде суретті ақпараттар орналастыру мәселелері қаралып, Қапшағай қаласы мен Сарқан ауданындағы аталған бағыттағы жұмыстардың барысы тыңдалды.

Алматы облысына арнайы іссапармен келген Премьер-Министр Кәрім Мәсімов аталарының туып-өскен жері Ақсу ауданында да болды. Облыс әкімі Серік Үмбетов бастап келген топ Жансүгір кентіндегі №21 кәсіптік лицей мен аудандық аурухананың тыныс-тіршілігімен жете танысты.

Облыстық ішкі саясат басқармасының ұйымдастыруымен қала әкімдігінің кіші жиын залында «Мемлекеттік саясатты насихаттаудағы азаматтық қоғам институттарының ролі» атты «дөңгелек үстел» өтті.